Koyata gang: इन्स्टावर मुलीच्या नावाने फेक अकाउंट बनवले, महिनाभर चाटींग करुन आज सकाळी तरुणाला भेटायला बोलावले आणि केला जीवघेणा हल्ला…. किरकटवाडी फाट्यावरील कोयता हल्ल्यामागची धक्कादायक माहिती;दोन आरोपी पुणे शहर पोलीसांच्या ताब्यात
Koyata gang: इन्स्टावर मुलीच्या नावाने फेक अकाउंट बनवले, महिनाभर चाटींग करुन आज सकाळी तरुणाला भेटायला बोलावले आणि केला जीवघेणा हल्ला…. किरकटवाडी फाट्यावरील कोयता हल्ल्यामागची धक्कादायक माहिती;दोन आरोपी पुणे शहर पोलीसांच्या ताब्यात
किरकटवाडी: सिंहगड रस्त्यावरील किरकटवाडी फाट्याजवळील cwprs कॉलनी गेटच्या समोर आज सकाळी 7 वाजण्याच्या सुमारास दुचाकीवरुन आलेल्या तरुणावर अज्ञात हल्लेखोरांनी कोयत्याने वार करुन गंभीर जखमी केल्याची धक्कादायक घटना घडली आहे. या हल्ल्यात सागर चव्हाण (वय 18, रा. लक्ष्मीनगर, कोथरुड) हा अत्यंत गंभीर जखमी झाला असून त्याच्यावर खाजगी रुग्णालयात उपचार सुरू आहेत. हल्लेखोर दुचाकी घटनास्थळी सोडून पसार झाले आहेत. मुख्य सिंहगड रस्त्यावर ही घटना घडल्याने परिसरात खळबळ उडाली होती.
दरम्यान याप्रकरणी धक्कादायक माहिती समोर आली आहे. आरोपींनी सुमारे एक महिन्यापूर्वी इन्स्टाग्रामवर मुलीच्या नावाने फेक अकाउंट तयार करून जखमी तरुणाला रिक्वेस्ट पाठवली. महिनाभर चाटींग केली. काल रात्री बोलने झाले आणि आज सकाळी खडकवासला परिसरात भेटायचे ठरले. ठरल्याप्रमाणे सागर चव्हाण आपल्या एका मित्राला सोबत घेऊन सकाळी लवकर किरकटवाडी फाट्याजवळ येऊन थांबला. तु कधी येतेय आम्ही पोहोचलोय असा मेसेज करुन करंट लोकेशन पाठवले आणि तिथेच घात झाला.
सागर चव्हाण आणि त्याचा मित्र दुचाकीवर थांबलेले असताना अचानक दुसऱ्या दुचाकीवरुन तोंडाला रुमाल बांधून अज्ञात हल्लेखोर आले. एकाने दुचाकीला लाथ मारल्याने सागर चव्हाण खाली पडल्यानंतर त्याच्यावर कोयत्यांनी सपासप वार सुरू केले. सागरने हात मधे घातल्याने हाताला व डोक्याला गंभीर जखमा झाल्या आहेत. सागर रक्ताच्या थारोळ्यात पडल्याचे पाहून आरोपी दुचाकी घटनास्थळी सोडून किरकटवाडी गावच्या दिशेने फरार झाले.
पूर्ववैमनस्यातून हल्ला?
दरम्यान जखमी सागर चव्हाण याच्यावर गुन्हा दाखल असून त्याच्या सोबत असलेल्या मित्रावरही गुन्हा दाखल आहे. आरोपींनी जून्या घटनेचा बदला घेण्यासाठी अत्यंत शांत डोक्याने मुलीच्या नावाने फेक अकाउंट तयार करून सागर चव्हाण याला जाळ्यात ओढले आणि प्रेमाचे नाटक करुन भेटायला बोलावले. हल्ल्यासाठी आणलेली दुचाकी जुनाट असून त्यावर नंबर नाही. त्यामुळे पूर्ववैमनस्यातून सुनियोजित पद्धतीने हा हल्ला केल्याची प्राथमिक माहिती समोर येत आहे.
दोन आरोपी शहर पोलीसांच्या ताब्यात
दरम्यान हल्ला करणाऱ्या हर्षद वांजळे व धनराज पाटील या दोन आरोपींना पुणे शहर पोलीस दलाच्या दरोडाविरोधी पथकाने ताब्यात घेतले असल्याची खात्रीशीर माहिती ‘द इन्व्हेस्टीगेशन एक्स्प्रेस’ला मिळाली आहे.
व्हाट्सप्प आइकान को दबा कर इस खबर को शेयर जरूर करें
