किरकटवाडी येथे होतकरू विद्यार्थ्यांना सायकल वाटप; कॅनरा रोबेको मिच्युअल फंड यांच्यावतीने उपक्रम; पायी चालत येणाऱ्या विद्यार्थ्यांच्या चेहऱ्यावर फुलले हास्य

किरकटवाडी: येथील नामदेवराव मोहोळ विद्या व क्रीडा प्रतिष्ठानच्या ज्ञानदा प्रशाला किरकटवाडी मधील दूर अंतरावरून चालत येणाऱ्या होतकरू विद्यार्थ्यांना मोफत सायकलचे वाटप करण्यात आले आहे. कॅनरा रोबेको मिच्युअल फंड यांच्या वतीने हा अत्यंत उपयुक्त उपक्रम राबविण्यात आला आहे. एकूण पंचविस विद्यार्थी व विद्यार्थिनींना सदर सायकलचे वाटप करण्यात आले.

ज्ञानदा प्रशालेच्या प्रांगणात हा कार्यक्रम पार पडला. संस्थेचे विश्वस्त अजिंक्य मोहोळ हे कार्यक्रमाच्या अध्यक्षस्थानी होते तर कॅनरा रोबेको मिच्युअल फंड पुणे चे ए. जी. एम. शरन मोगर हे प्रमुख पाहुणे म्हणून उपस्थित होते. यावेळी कॅनरा रोबेकोचे क्लस्टर हेड कुलदीप थोरगुले, सेल्स असिस्टंट मॅनेजर किरण डोईफोडे , हर्षल बराटे, वारजे शाखा व्यवस्थापक अयोध्या सदार, जगदीश शर्मा, अशोक मते, अरुण कंगाळ, स्थानिक स्कूल कमिटी सदस्य, ग्रामस्थ, पालक व विद्यार्थी उपस्थित होते.

येत्या काही दिवसांमध्ये आणखी 12 सायकल विद्यार्थ्यांना देण्यात येणार असल्याचे कार्यक्रमासाठी उपस्थित अरुण कंगाळ यांच्या वतीने जाहीर करण्यात आले. सायकल मिळाल्यानंतर विद्यार्थी व विद्यार्थिनींच्या चेहऱ्यावर हास्य उमटले होते. संस्था व शाळेच्या वतीने कॅनरा रोबेको मिच्युअल फंडचे आभार व्यक्त करण्यात आले. मुख्याध्यापक एल. सी. खुने यांनी प्रास्ताविक, शिक्षक सुभाष पायगुडे यांनी सुत्रसंचालन केले तर दिपक परदेशी यांनी सर्वांचे आभार मानले.